لا من دعاني سيد كل الغنادير
اجيه قبل اكمل حروف لبيه


واذا نشدوني الناس يبغون تبرير
وقالولي انت تحبها قلت انا ايه

احبها والحب ماله تفاسير
يدخل سويدا القلب من دون تنبيه

مثل القدر ما يمنعنه تدابير
يطيعه الدرويش ويطيعه البيه

وان لامني عامر وعاتبني عمير
ما هزت جبال المحبة مشاريه

كنا سوا دايم وخلق الله تغير
واليوم مدري وين صارت اراضيه

يا طير تكفى كان مريت يا طير
دار الحبيب تقول له غيبته ليه

قله جفا والا حدته المقادير
وانا كذا والا كذا اهواه وابغيه

غير وغرامه غير والشوق له غير
حتى وانا في عز نومي اناديه

ما صار حبي له ولا اظن بيصير
احس كن القلب ماهو مكفيه

لا عنترة ذاقه ولا سالم الزير
ولا جميل وقيس ذاقوا بلاويه

ولا صوروه اهل القصص والاساطير
وحتى خشبة هليود عيت تحاكيه

وتخونني لا من نطقت التعابير
والحرف كل ما اكتبه ارجع امحيه

من زود حبه صرت انا من المشاهير
اللي يطشون المية كنها جنيه

تاخذني همومي معاها مشاوير
ومن الحزن دمعي خدودي تناديه

الشوق ما يقبل ظروف ومعاذير
والحب ما يترك فوادٍ سكن فيه

الحل ما اهدتني اليه التفاكير
والشعر ما سلت فوادي قوافيه

الله عساه يغير الحال تغيير
ويرجع الما لين يجري بساقيه

ويجيب اغلى غايب بعافية وخير
بعد الغياب لمن يحبه ويغليه