تاريخ كتابة التاريخ

فكرة التأريخ بوضعها الحالى بتعتبر فكره جديده بتدور حوالين اربع محاور
هى : 1- ان التاريخ علم زى أى علم بيحاول يجاوب على اسئله معينه. 2- ان
التاريخ بيتصل بمجهود الانسان فى الماضى. 3- ان طريقة التاريخ هى تفسير
الوثائق التاريخيه. 4- ان التاريخ بيهدف لتعريف الانسان بذاته.

فكرة التاريخ بمحاورها الاربعه ما كانتش موجوده فى كل العصور، فزمان عند قدماء المصريين
و السومريين مثلاً كتابة التاريخ كانت عباره عن النقوش الرسميه أو شبه
الرسميه المقصود منها احياء ذكرى ملك او تمجيد اله أو انتصار فى حرب. فى اوروبا فى العصور الوسطى
المؤرخين كانو عادة قسسه و الناس كانو بيبصو للتاريخ على انه من فعل القدر
أو الرب. الطرق دى طبعاً ما بتديش تاريخ حقيقى و ان كانت بتدينا صور بتتصل
بالتاريخ فى نواحى معينه، و ما بتعتبرش تأريخ علمى لانها ما بتجاويش على
اسئله محدده ما بيعرفهاش الكاتب و انما هو كان بيسجل حاجات كان أصلاً عارف
انها حقيقه، و فوق كده الحاجات دى ما كانتش بتعتبر عادة من فعل الانسان لكن
من فعل الالهه و الانسان كان فيها مجرد اداه وبكده كانت و لا تاريخيه من
حيث الطريقه لانها ما كانتش بتعتمد على وثائق، و لا كانت تاريخيه من حيث
قيمتها لانها ما كانتش بتهدف لإن الانسان يعرف نفسه لكن كانت بتخدم معرفة
الانسان بالالهه. بالشكل ده الكاتب ما كانش بيكتب تاريخ لكن كان بيكتب عن
الدين و الالهه. بالنسبه للمؤرخين و الباحثين فى العصر الحديث بتعتبر
الكتابات دى وثائق تاريخيه بيعتمدو عليها فى كتابة التاريخ بالصوره
الحديثه.